Friday, 16 November 2018

W Weekly Update

Հոկտեմբերի 21-28

Հոկտեմբերի 23-ին նախագահ Սերժ Սարգսյանը ստորագրել է «Հայաստանի Հանրապետության եւ Ռուսաստանի Դաշնության միջեւ ՀՀ զինված ուժերի ու ՌԴ զինված ուժերի զորքերի (ուժերի) միացյալ խմբավորման մասին» համաձայնագիրը վավերացնելու օրենքը, որն Ազգային ժողովն ընդունել էր հոկտեմբերի 5-ին: Համաձայնագրում մասնավորապես նշվում է, որ «հաշվի առնելով հավաքական անվտանգության Կովկասյան տարածաշրջանում կողմերի տարածքների առանձնացվածությունը եւ դրանց սահմաններում լուծվող օպերատիվ-ռազմավարական խնդիրների ծավալը, անհրաժեշտ է ստեղծել զինված ուժերի միացյալ խմբավորում, որը կպաշտպանի կողմերի քաղաքացիներին եւ հասարակությանը արտաքին ու ներքին ռազմական սպառնալիքներից»։

Ազգային ժողովում համաձայնագիրը քննարկվել էր բուռն մթնոլորտում:

ՀՀ վարչապետի հրավերով հոկտեմբերի 24-ին պաշտոնական այցով Երեւանում էր Ռուսաստանի վարչապետ Դմիտրի Մեդվեդեւը: «Զվարթնոց» օդանավակայանում նրան դիմավորել էր ՀՀ վարչապետ Կարեն Կարապետյանը: Մեդվեդեւի գլխավորած պատվիրակության կազմում էին Ռուսաստանի կառավարության ղեկավարի առաջին տեղակալ Իգոր Շուվալովը, «Գազպրոմ» ՀԲԸ վարչության նախագահ Ալեքսեյ Միլլերը, ռուս նախարարներ եւ պաշտոնատար այլ անձինք: Դիմավորման պաշտոնական արարողությունից հետո Ռուսաստանի վարչապետն ուղեւորվել էր Ծիծեռնակաբերդի հուշահամալիր եւ հարգանքի տուրք մատուցել Հայոց ցեղասպանության զոհերի հիշատակին: Այցի շրջանակում Կարապետյան-Մեդվեդեւ առանձնազրույցին հաջորդել էին ընդլայնված կազմով բանակցություններն ու փաստաթղթերի ստորագրման արարողությունը։ Նույն օրը Սերժ Սարգսյանն ընդունել է պաշտոնական այցով Հայաստան ժամանած Ռուսաստանի Դաշնության կառավարության ղեկավարին: Հոկտեմբերի 25-ին Դմիտրի Մեդվեդեւը Երեւանում մասնակցեց Եվրասիական միջկառավարական խորհրդի նիստի աշխատանքներին։

Երեւանում հոկտեմբերի 24-25-ը անցկացվեց Եվրասիական ﬕջկառավարական խորհրդի նիստը։ Մասնակցում էին Հայաստանի, Բելառուսի, Ղազախստանի, Ղրղզստանի, Ռուսաստանի կառավարությունների ղեկավարները, ինչպես նաեւ Եվրասիական տնտեսական հանձնաժողովի (ԵԱՏՀ) կոլեգիայի նախագահ Տիգրան Սարգսյանը։ Եվրասիական միջկառավարական խորհրդի անդամներին ընդունել է ՀՀ նախագահը: Սերժ Սարգսյանը վստահություն է հայտնել, որ միջկառավարական խորհրդի նիստն արդյունավետ կլինի ու կծառայի եվրասիական ինտեգրացիան առաջ մղելու շահերին, ինչպես նաեւ կնպաստի երկու շաբաթ առաջ ԵԱՏՄ հերթական գագաթնաժողովում բարձր մակարդակով ձեռքբերված պայմանավորվածությունների իրականացմանը:

Ազգային ժողովում առաջին ընթերցմամբ ընդունվել է «Պաշտպանության մասին» օրենքի նախագիծը: Հոկտեմբերի 25-ին քննարկումները դեռ շարունակվում էին: Օրինագիծը հիմնականում ուղղված է ՀՀ զինված ուժերի օրենսդրական դրույթները փոփոխված Սահմանադրությանը համապատասխանեցնելուն: Փաստաթղթով սահմանվում են մի շարք կարեւոր դրույթներ, այդ թվում՝ ՀՀ զինված ուժերի գլխավոր շտաբի պետի, պաշտպանության նախարարի լիազորություններին վերաբերող: Օրենսդրական նախաձեռնությամբ կարգավորվում են զինված ուժերի, պաշտպանության նախարարության գործունեությանը, գործառույթներին վերաբերող մի շարք այլ դրույթներ եւս:

Իսրայելի նախագահ Ռոուվեն Ռիվլինը հոկտեմբերի 26-ին իր նստավայրում ընդունեց Շառլ Ազնավուրին: Ռաուլ Վալենբերգի անվան միջազգային հիմնադրամի կողմից ֆրանսահայ աշխարհահռչակ շանսոնիեն ու նրա քույրը՝ Աիդան, պարգևատրվեցին շվեդ դիվանագետ Վալենբերգի անվան մեդալներով: Հրեա պրոֆեսոր, ցեղասպանագետ Յաիր Աուրոնը հանդիպում է ունեցել Ազնավուրի հետ ու գրի առել նրա ծնողների՝ Միշայի ու Քնարի, ինչպես նաև հենց իր ու քրոջ սխրանքների մասին պատմությունները՝ կապված Երկրորդ աշխարհամարտի տարիներին ֆաշիստներից հայեր ու հրեաներ փրկելու հետ: Այդ տարիներին Ազնավուրյանները համակրում ու աջակցում էին հայտնի պարտիզան, հետմահու Ֆրանսիայի Ազգային հերոս հռչակված Միսաք Մանուշյանին ու նրա խմբին և ապաստան էին տրամադրում թե՛ հայերին ու հրեաներին և թե՛ այլ ազգերի ներկայացուցիչների՝ վտանգելով սեփական կյանքը:

Լրացավ «Հոկտեմբերի 27»-ի ողբերգության 18-րդ տարին։ 1999 թվականի հոկտեմբերի 27-ին հարձակում տեղի ունեցավ Ազգային ժողովի վրա, երբ հերթական նիստին կառավարությունը պատասխանում էր պատգամավորների հարցերին: Սպանվեցին Ազգային ժողովի նախագահ Կարեն Դեմիրճյանը, վարչապետ Վազգեն Սարգսյանը, խորհրդարանի փոխնախագահներ Յուրի Բախշյանն ու  Ռուբեն Միրոյանը, պատգամավորներ Արմենակ Արմենակյանը, Միքայել Քոթանյանը, Հենրիկ Աբրահամյանը և նախարար Լեոնարդ Պետրոսյանը, ևս 8 հոգի վիրավորվեց։ 2003 թվականի դեկտեմբերի 2-ի դատավճռով Երևանի Կենտրոն և Նորք-Մարաշ համայնքների առաջին ատյանի դատարանը ցմահ ազատազրկման դատապարտեց Նաիրի Հունանյանին և նրա հանցախմբի 5 անդամներին, հանցախմբի ևս մեկ անդամ դատապարտվեց 14 տարվա ազատազրկման: Ցմահ ազատազրկման դատապարտված Վռամ Գալստյանը հետագայում ինքնասպանություն գործեց, իսկ 14 տարվա ազատազրկման դատապարտված Համլետ Ստեփանյանը հանկարծամահ եղավ։

«Հոկտեմբերի 27»-ի գործով ձերբակալված Նորայր Եղիազարյանը, երբ գործը դեռ նախաքննության ընթացքում էր, ըստ պաշտոնական վարկածի` Նուբարաշենի մեկուսարանում էլեկտրահարվեց։ Ազգային ժողովի այգում «Հոկտեմբերի 27»-ին զոհված պետական, կուսակցական գործիչների հիշատակը հավերժացնող հուշակոթող է կանգնեցվել:

10 November 2018
02 November 2018
27 October 2018
13 October 2018
20 September 2018
14 September 2018

Ռազմավարական եւ ազգային հետազոտությունների հայկական կենտրոն

ՀՀ, Երևան 0033, Երզնկյան 75

Հեռ.՝

+374 10 528780 / 274818

Էլ. փոստ՝

info@acnis.am

Վեբկայք՝

www.acnis.am