ՌԱՀՀԿ սեմինարի թեման նվիրված էր ժողովրդավարացման փորձին
13 ապրիլի 2012թ., Երեւան: Այսօր Ռազմավարական եւ ազգային հետազոտությունների հայկական կենտրոնի (ՌԱՀՀԿ) երիտասարդական դպրոցում տեղի ունեցավ «Անցումային հասարակությունների առանձնահատկությունը» խորագրի վերջին` չորրորդ սեմինար-դասընթացը: Այն նվիրված էր «20-րդ դարի ժողովրդավարացման փորձը» թեմային եւ վարում էր ՌԱՀՀԿ փորձագետ Էդգար Վարդանյանը: Դասախոսությունը զուգակցվում էր փաստագրական կինոնկարի ցուցադրությամբ:
Ծրագրով նախատեսված մյուս 9-ը պարապմունքները, որոնք եզրագիծը կհատեն հունիսի 15-ին, նվիրված են Քաղաքացի-հասարակություն-պետություն եռամիասնության եւ Հայաստանի ու Արցախի ժողովրդավարացման հիմնախնդիրների ուսումնասիրմանը: Դպրոցում մշտապես ընդգրկված 24 ունկնդիրներին կարող են միանալ բոլոր ցանկացող երիտասարդները, ովքեր հետաքրքրված են ՀՀ-ում քաղաքացիական հասարակության կայացման եւ սահմանադրական պետության ձեւավորման խնդիրներով: Պարապմունքներն անցկացվում են շաբաթական պարբերականությամբ:
Ռազմավարական եւ ազգային հետազոտությունների հայկական կենտրոնը 1994թ. հիմնադրել է ՀՀ առաջին արտգործնախարար Րաֆֆի Կ. Հովհաննիսյանը՝ արժանանալով հայաստանյան եւ Սփյուռքի աջակիցների լայն շրջանակների զորակցությանը: Հետեւելով համաշխարհային զարգացումներին, գիտելիքների հիմքեր խարսխելով, հանրության հետ երկխոսություն ծավալելով՝ Կենտրոնը հետխորհրդային տիրույթում հանդես է գալիս որպես երկրաքաղաքական ստեղծագործական մտածողություն ձեւավորող եւ միջազգային միջավայրի համապարփակ ընկալմանը նպաստող ուժ: Վերջին շրջանում Կենտրոնն առաջնահերթ տեղ է հատկացնում տարածաշրջանային անվտանգության ու համագործակցության, քաղաքացիական կրթության, պետության եւ ազգի համար վճռորոշ՝ ներքին ու արտաքին քաղաքականությունների կիրառական հետազոտությանը:
Լրացուցիչ տեղեկությունների համար կարող եք դիմել ՌԱՀՀԿ՝ Երեւան, Երզնկյան 75, հեռախոս՝ (37410) 528-780 կամ 274-818, հեռապատճեն՝ (37410) 52-48-46, էլ. փոստ root@acnis.am եւ info@acnis.am: |