Thursday, 16 July 2020

C Center in the Press

Փաշինյանի ցուցակում հեղափոխական էյֆորիան ներկայացնող մարդիկ են լինելու. քաղաքագետ (Shabat.am)

Star InactiveStar InactiveStar InactiveStar InactiveStar Inactive
 

Դեկտեմբերին սպասվող արտահերթ խորհրդարանական ընտրություններին ընդառաջ ամենից շատ քննարկվող հարցն այն է, թե ովքեր կմտնեն խորհրդարան և հեղափոխական կուսակցության ցուցակն ինչպիսին կլինի: Այս հարցերի շուրջ Shabat.am-ը զրուցել է քաղաքագետ Մանվել Սարգսյանի հետ:

Քաղաքագետն այս ընտրությունների հիմնական պրոբլեմներից մեկը ընտրական օրենսգիրքն է համարում:

«Այդ հրեշավոր օրենսգիրքը պետք է փոխել, նման ձևով խորհրդարանական ընտրություններ անցկացնելն անթույլատրելի է,- ընդգծեց Սարգսյանը՝ շեշտելով,- Հիմա հետհեղափոխական վիճակ է, և այս ընտրությունները դասական ընտրություններ չեն, այլ լինելու է հետհեղափոխական տրամադրությունների արտահայտում, ավելի շուտ հանրաքվե, ի պաշտպանություն այս հեղափոխական պրոցեսների: Մարդկանց հիմա հետաքրքրում է մի հանգամանք. որևէ կերպ թույլ չտալ նախկին ռեժիմի ներկայացուցիչներին հայտնվել պառլամենտում»:

Սարգսյանը նշեց, որ պատկերն ակնհայտ դարձավ ավագանու ընտրությունների ժամանակ, երբ ժողովուրդն արհամարհեց մյուս կուսակցություններին՝ ուղղակի ձայն տալով Նիկոլ Փաշինյանի ներկայացրած ցուցակին՝ աջակցություն հայտնելով հեղափոխությանը:

«Այս ընտրությունների ժամանակ մենք 100 տոկոսով կտեսնենք նույն պատկերը: Պարզապես փոփոխվող օրենսդրությամբ երեք կուսակցություն 1.5-2 տոկոս ձայնով կարող է մտնել խորհրդարան 8-10 պատգամավորով: Սա իհարկե, վտանգ է ներկայացնում, որովհետև մեկ-երկու տոկոս աջակցություն ունեցող որևէ ուժ հանկարծակի իրավունքներ է ստանալու խորհրդարանում»:

Քաղաքագետի մտավախությունը միայն խորհրդարանում պատահական ընդդիմության հայտնվելը չէ, այլև հեղափոխական  կուսակցության ցուցակում ընդգրկվելիք մարդիկ:

«Նրանք ծրագիր չեն ներկայացնում: Նրանք հեղափոխական էյֆորիա ներկայացնող մարդիկ են, որոնք նույնպես պարզ չէ՝ ինչ կենսագրություն ունեն, ինչ ունակություններ ունեն, ինչ սկզբունքով են հայտնվելու ցուցակում: Հաճախ գրում են, որ այս կամ այն մարդը նշանակվել է պաշտոնի, քանի որ մասնակցել է պայքարին: Մարդը կարող է շատ լավ պայքարող լինել, բայց բացարձակապես ոչ մի ունակություններ և գիտելիք չունենա, որ զբաղեցնի տվյալ պաշտոնը կամ մանդատ վերցնի: Շատ դժվար է ընդհանրապես պատկերացնել՝ թե ոնց է գործելու նման խորհրդարանը: Շատերը նշում են, որ միահեծան իշխանություն է  ձևավորվելու: Շատ բարդ իրավիճակ է»,- եզրափակեց Սարգսյանը:

The Armenian Center for National and International Studies

Yerznkian 75, 0033
Yerevan, Armenia

Tel.:

+374 10 528780 / 274818

Website:

www.acnis.am

  

The views of the authors do not necessarily reflect those of the Center.

While citing the content, the reference to "ACNIS ReView from Yerevan” is obligatory.